జగన్ సర్కారుకు ఊరట.. సచివాలయ ఏర్పాటుపై నేవీ కీలక ప్రకటన

విశాఖపట్నంలోని మిలీనియం టవర్స్‌లో సచివాలయం ఏర్పాటుపై నేవీ అధికారులు అభ్యంతరం వ్యక్తం చేస్తున్నారంటూ వస్తున్న వార్తలను తూర్పు నావల్ కమాండ్ ఖండించింది.విశాఖపట్నంలో పరిపాలనా రాజధాని ఏర్పాటుపై నేవీ అధికారులు అభ్యంతరం వ్యక్తం చేస్తున్నారంటూ వస్తున్న వార్తలను తూర్పు నావల్ కమాండ్ (ఈఎన్‌సీ) ఖండించింది. ముఖ్యమంత్రి వైఎస్ జగన్‌మోహన్‌రెడ్డికి నేవీ అధికారులు షాకిచ్చారంటూ వస్తున్న కథనాలను కొట్టిపారేసింది. ఈ మేరకు కేంద్ర రక్షణ శాఖ శనివారం సాయంత్రం ఓ ప్రకటన విడుదల చేసింది.విశాఖపట్నంలోని మిలీనియం టవర్స్‌లో సచివాలయం ఏర్పాటు చేసుకునేందుకు ఏపీ ప్రభుత్వం నుంచి తమకు ఎలాంటి ప్రతిపాదన రాలేదని, దీనిపై అభ్యంతరాలు చెప్పలేదని కేంద్ర రక్షణ శాఖ స్పష్టం చేసింది. శనివారం పలు మీడియా సంస్థల్లో వెలువడిన కథనాలతో ఈ మేరకు వివరణ ఇస్తున్నట్లు తెలిపింది.మిలీనియం టవర్స్‌లో రాజధాని ఏర్పాటు చేయొద్దని నేవీ అధికారులు ప్రభుత్వానికి చెప్పారని టీడీపీ నాయకులు శనివారం మీడియాతో చెప్పిన విషయం తెలిసిందే. సెక్రటేరియట్ ఏర్పాటు చేయాలనుకుంటున్న మిలీనియం టవర్స్‌కు సమీపంలో.. దేశ భద్రతకు అత్యంత కీలకమైన ఐఎన్ఎస్ కళింగ ఉండటమే దీనికి కారణమని టీడీపీ మాజీ ఎమ్మెల్యే బోండా ఉమామహేశ్వరరావు వ్యాఖ్యానించారు. తాజాగా, ఈ ప్రచారాన్ని నేవీ కొట్టిపారేసింది.